Alzar a voz, tomar a palabra

Desde CSIF Galicia queremos poñer en valor, como xa fixeron os meus compañeiros, o éxito de participación nesta campaña, que evidencia o NON rotundo da maioría do profesorado galego ao acordo de renuncias asinado por unha minoría da representación sindical co actual goberno da Xunta do señor Rueda.

Máis de 16.000 sinaturas supón un éxito case sen precedentes de participación. Significa que máis da metade do profesorado, somos arredor de 33.000 compañeiros e compañeiras, nos mobilizamos de novo cunha mensaxe clara: O PROFESORADO NON SE VENDE.

Berrámolo nas rúas a finais do pasado ano, berrámolo a través de dúas exitosas xornadas de folga e volvemos berralo agora coa presentación destes milleiros e milleiros de sinaturas.

Dende CSIF, cremos no diálogo e amosamos a nosa enteira disposición a que todas as partes sentaran a falar para buscar pontos de encontro que permitisen reconsiderar os aspectos máis lesivos do acordo e incorporar demandas fundamentais,IRRENUNCIABLES, como as ratios, a carga burocrática… pero non foi posible. Como lembrades, non só non foi posible senón que se nos botou da Consellería.

O ruido electoral das últimas semanas tampouco deu moita marxe aos problemas reais do ensino en Galicia e dos seus traballadores e traballadoras, por iso hoxe queremos facer un chamamento, EMPRAZAMOS ao próximo goberno, sexa da cor que sexa, a que fixe na axenda, como prioridade, de xeito inmediato, unha reunión que faga posible mudar ese "acordo de renuncias” polo auténtico "Acordo de Dereitos” que a inmensa maioría da comunidade docente estamos a reclamar.